बिज्ञापन

बिज्ञापन

गत भदौ २३ र २४ गते भएको जेनजी आन्दोलनका क्रममा रामशाह पथस्थित मन्त्रालयको मुख्य भवन आगलागीबाट पूर्ण रूपमा नष्ट भएपछि मन्त्रालयको प्रशासनिक संरचना विभिन्न स्थानमा विभाजित भएको थियो। त्यसपछि सिंहदरबारभित्र नेपाली सेनाको खाली रहेको जग्गामा प्रिफ्याब क्याबिन निर्माण गरी सचिवसहितका केही महाशाखा त्यहीँबाट सञ्चालन गरिएका थिए। अर्कोतर्फ मन्त्रीको कार्यकक्ष भने भूमि व्यवस्था, संघीय मामिला तथा सामान्य प्रशासन मन्त्रालयको भवनमा राखिएको थियो।

मन्त्री र सचिवालय फरक–फरक स्थानमा सञ्चालन हुँदा दैनिक प्रशासनिक समन्वय, निर्णय प्रक्रिया र सेवाप्रवाहमा व्यावहारिक कठिनाइ देखिएको मन्त्रालयका अधिकारीहरू बताउँछन्। यही अवस्थालाई अन्त्य गर्न मन्त्रालयले अहिले आफ्नो प्रशासनिक संरचनालाई क्रमशः एउटै भवनमा स्थानान्तरण गरिरहेको हो।

हाल भूमि व्यवस्था, संघीय मामिला तथा सामान्य प्रशासन मन्त्रालयको भवनको दोस्रो र तेस्रो तलामा स्वास्थ्य मन्त्रालयका विभिन्न शाखा तथा महाशाखाको व्यवस्थापन भइरहेको छ। सचिवसँग सम्बन्धित कार्यालय, सचिवालय तथा अन्य प्रशासनिक एकाइहरूलाई पनि चरणबद्ध रूपमा सोही भवनमा सार्ने काम जारी रहेको मन्त्रालयले जनाएको छ।

करिब एक वर्षसम्म अस्थायी तथा विभाजित संरचनाबाट सेवा प्रवाह गर्दै आएको मन्त्रालय अब एउटै छानामुनि सञ्चालनमा आएपछि आन्तरिक समन्वय, निर्णय प्रक्रियाको गति र नागरिकलाई प्रदान गरिने सेवा थप व्यवस्थित, छिटो र प्रभावकारी हुने विश्वास मन्त्रालयको छ।